DMK: அதிக ஓட்டுகளை வாங்கி தரும் பூத் கமிட்டி திமுக நிர்வாகிகளுக்கு புல்லட் பைக், 5 பவுன் தங்க செயின் வழங்கப்படும். வெளிநாடுகளுக்கு சுற்றுலா அழைத்து செல்லப்படும் என வலை வீசியுள்ளது திமுக. இதனால் தீயா இறங்கி வேலை பார்க்கின்றனர் திமுக நிர்வாகிகள்.
ஜூன் 3ம் தேதி கருணாநிதி நுாற்றாண்டு பிறந்த நாள் கொண்டாடப்படுகிறது. அடுத்த நாள் மக்களவை தேர்தல் வாக்கு எண்ணிக்கை நடக்கிறது. எனவே தமிழகத்தில் 39, புதுச்சேரி 1 என 40 தொகுதிகளிலும் 100 சதவீதம் வெற்றி பெற வேண்டும் என்று அமைச்சர்கள், மாவட்ட செயலர்கள், வேட்பாளர்களுக்கு, கட்சி தலைமை உத்தரவிட்டுள்ளது.
தேர்தல் பணிகள் தொடர்பாக, பிரசாரம் முடிந்ததும் தினமும் இரவு வேட்பாளர், பொறுப்பு அமைச்சர், முக்கிய நிர்வாகிகள் பங்கேற்கும் கூட்டம் நடக்கிறது. அதில் அதிக ஓட்டுகளை வாங்கி தரும் பூத், வார்டு, ஒன்றிய நிர்வாகிகளுக்கு சிறப்பு பரிசு வழங்கப்படும் என்ற உறுதி தரப்பட்டுள்ளது.
அதுவும் முதல்வர் ஸ்டாலின் கையால் வழங்கப்படும் என மூத்த நிர்வாகிகள் கூறியுள்ளனர். குறிப்பாக அரக்கோணம், வேலுார், ஸ்ரீபெரும்புதுாரில் திமுக சார்பில் போட்டியிடும் வேட்பாளர்களின் தரப்பில் கட்சியினருக்கு இந்த வாக்குறுதிகள் உறுதியாக கிடைக்கும் என கூறப்பட்டுள்ளது.
