Tractor Upside: தஞ்சை மாவட்டம் பாபநாசம் அருகே சோலைப்பூஞ்சேரி கிராமம். இந்த ஊரை சேர்ந்த தமிழரசன் என்பவர் சொந்தமாக டிராக்டர் வைத்து தன்னுடைய விவசாய நிலத்திலும், வாடகைக்கும் ஓட்டி வந்துள்ளார். கிடங்காநத்தம் கிராமத்துக்கு வாடகைக்கு சென்றார். அங்கே விவசாய நிலத்தில் டிராக்டரில் உழுது கொண்டிருந்தார். அப்போது எதிர்பாராத விதமாக டிராக்டர் பள்ளத்தில் சிக்கி சேற்றில் தலைகீழாக கவிழ்ந்தது. டிராக்டருக்கு அடியில் சிக்கிய தமிழரசன் சேற்றுக்குள் புதைந்துள்ளார்.
அதிர்ச்சியடைந்த மற்ற விவசாயிகள் தங்களுடைய டிராக்டரை கொண்டு வந்து கவிழ்ந்த டிராக்டரை கயிறு மூலமும் இழுக்க முயன்றனர். ஆனால் டிராக்டர் பாதியளவு சேற்றுக்குள் புதைந்ததால் அதனை மீட்க முடியவில்லை. தீயணைப்புத் துறையினர் 2 மணி நேரம் போராடி டிராக்டரை அப்புறப்படுத்தி சேற்றுக்குள் புதைந்திருந்த தமிழரசனை மீட்டனர். அவரை அருகில் உள்ள அரசு மருத்துவமனைக்குக் கொண்டு சென்றனர். அங்கு அவரை பரிசோதித்த மருத்துவர்கள் ஏற்கனவே உயிரிழந்து விட்டதாகத் தெரிவித்தனர்.
